On the road 25.10.2024
Visita da la destinaziun Partenz
En la regiun dal Partenz datti numerus:as actur:as cultural:as ed ils basegns da las singulas vischnancas èn fitg differents. L'usit e la tradiziun èn ina part da la vita quotidiana en il Partenz, la cultura è marcada fermamain dals Gualsers. Ma era l'art contemporan è preschent en la val ed i dat ina scena da musica multifara (musica populara, musica classica, jazz u era hiphop).
graubünden Cultura ha inscuntrà a Claustra quatter actur:as cultural:as da la regiun: il responsabel per il svilup regiunal dal Partenz, il president da l'allianza culturala e da la cumissiun culturala dal Partenz, la gruppa culturala da St. Antönien e l'incumbensà per la cultura dal biro da cultura dal Partenz.
Invistas.
Las pli impurtantas constataziuns
- La destinaziun considerescha il turissem cultural sco plitost impurtant.
- I na dat actualmain nagina strategia culturala surordinada.
- Dapi il 2010 disponan las vischnancas d'in post spezialisà per la cultura che cumpiglia in pensum da 20 %. Las incumbensas dal manader Achim Gansner èn da colliar las persunas activas en la cultura, da far la communicaziun en connex cun las occurrenzas culturalas ed era d'iniziar projects. Quai fa el en stretga collavuraziun cun la cumissiun culturala da la regiun. Ils pertschients da plazza na tanschan betg per sviluppar vinavant il turissem cultural a moda persistenta. Per in tal svilup dovri il sustegn d'ulteriurs acturs, sco per exempel dal svilup regiunal u da terzs.
- Las vischnancas dal Partenz alimenteschan in fond da contribuziuns regiunal, cun il qual la cumissiun culturala po sustegnair era projects turistic-culturals (CHF 42'500.- l'onn). Ultra da quai sustegnan singulas vischnancas a moda specifica instituziuns ed occurrenzas culturalas (t.a. Claustra, Grüsch e Luzein).
- La collavuraziun tranter la cultura ed il turissem ha tenor las acturas ed ils acturs involvi:das anc potenzial da meglierament. Sco a la cultura mancan er a Prättigau Marketing las capacitads da sviluppar vinavant las purschidas ed ils products.
«Cun Klosters Music, Tastentage Klosters e la chasa per musica populara a St. Antönien èn vegnids lantschads cun success ils ultims onns novas occurrenzas e projects innovativs. Els mussan ch'il turissem cultural funcziuna. Sch'i reussescha da consolidar e da promover quest svilup era cun graubünden Cultura, fiss quai cumplainamain en il senn dal svilup regiunal.»
Georg Fromm, incumbensà per il svilup regiunal
5 Bilder anzeigen
