Novitads 08.12.2024
Salva la cultura il turissem?
La runda da discussiun da l'emissiun Südostschweiz Standpunkte, moderada dad Olivier Berger, s’occupa d’in tema da l'avegnir: Pon purschidas culturalas emplenir las largias che sa resultan tras il regress dals giasts dal sport d'enviern en las muntognas? Katharina Beisiegel, directura dal Museum da Kirchner, Giovanni Netzer, fundatur e manader dad Origen Festival Cultural, e Martin Vincenz, CEO da Grischun Vacanzas, han discutà davart las schanzas ed ils cunfins dal turissem cultural.
La refusa d’engrondir il Museum da Kirchner a Tavau cun in edifizi supplementar mussa las sfidas da projects culturals en il territori alpin. Malgrà la pussaivladad d'integrar ina collecziun d'art impurtanta, ha la populaziun da Tavau refusà il project pervia dals auts custs. In problem central è ch’il museum vegn savens resentì sco instituziun turistica. La directura Katharina Beisiegel accentuescha ch’i sto en l’avegnir reussir d'integrar pli fermamain la populaziun locala e da posiziunar il museum sco part da la vischnanca.
La decisiun reflectescha ina ferma priorisaziun en las regiuns da muntogna: il focus vegn mess sin il sport d'enviern e sin purschidas en il liber, entant ch'il potenzial da la cultura vegn savens sutvalità. Per diversifitgar il turissem a lunga vista pudess la cultura giugar ina rolla centrala gist en temps da la midada dal clima. Il CEO da Grischun Vacanzas, Martin Vincenz, vesa en la colliaziun da cultura e natira ina strategia empermettenta. La cumbinaziun da tuts dus elements possia pledentar novas gruppas en mira e far la regiun pli independenta da la naiv.
L’Origen Festival Cultural da Giovanni Netzer mussa co che la cultura po vegnir integrada profundamain en la vischnanca. Cun concepts creativs e cun integrar stretgamain la populaziun èsi reussì da stgaffir in model per eveniments culturals persistents. Netzer declera: "Sch’ils projects culturals sa sviluppan or da la regiun sezza e las artistas ed ils artists daventan part da la cuminanza, nascha in dialog che stgaffescha identificaziun ed acceptanza." Questa enragischaziun na rinforzia betg mo l'attractivitad culturala, mabain era l'attractivitad economica d'ina regiun.
Las turistas ed ils turists da cultura valan sco gruppa en mira spezialmain attractiva, perquai ch'els dattan ora surproporziunalmain blers daners e restan savens pli ditg. Tuttina è la dependenza dal sport d'enviern anc adina gronda en regiuns sco il Grischun. Per equilibrar la fluctuaziun stagiunala e per segirar l'avegnir dovri novas vias. Iniziativas sco graubünden Cultura emprovan da colliar pli stretgamain la cultura ed il turissem e da rinforzar il Grischun sco destinaziun da cultura. La finamira n'è betg d'etablir la cultura mo sco cumplettaziun, mabain sco part centrala da l'identitad e da l'economia regiunala.
Il turissem cultural porscha al Grischun la pussaivladad da sa diversifitgar a lunga vista. La refusa d’engrondir il Museum da Kirchner duai esser in clom da resvegl da considerar la cultura sco part integrala da l' identitad regiunala e sco element per ina strategia turistica orientada al futur.
Contribuziun en l’emissiun Südostschweiz Standpunkte
Guardai qua la contribuziun cumpletta da l'emissiun Südostschweiz Standpunkte.