Il mussavia.
La suprastanza da l'uniun
Stefan Forster.
Persistenza e creaziun da valur tras la stima e la valurisaziun da la cultura!
«La cultura pussibilitescha identitad, reflexiun, incumparabladad, qualitad da viver e furmaziun. En las Alps datti strusch in spazi cultural ch'è uschè multifar e collià talmain ferm cun l'identitad en la societad sco il Grischun. Quai è era la basa per ina buna qualitad da viver ed il medem mument ina resursa da svilup enorm custaivla. Precis qua cumenza il project graubünden Cultura: persistenza e creaziun da valur tras la stima e la valurisaziun da la cultura!
Suenter mia scolaziun sco scolast primar a Cuira hai jau instruì intgins onns a Tavau ed en la citad da Berna. Suenter hai jau studegià geografia ed istorgia a l'Universitad da Berna. Gia durant il studi e suenter sun jau stà involvì en in manaschi da cultura e da gastronomia. Cun ulteriurs partenaris hai jau lura fundà ina societad da commerzi da vin ch'i dat anc oz. Plinavant hai jau pudì furmar cun quatter collegas da geografia in biro privat da cussegliaziun e perscrutaziun en il champ dal svilup regiunal persistent e dal turissem natiral e cultural en las Alps. Oz sun jau professer a l'Institut per ambient e resursas natiralas IUNR da la Scola auta turitgaisa per scienzas applitgadas ZHAW. Jau hai pudì crear il post extern grischun da la ZHAW (la gruppa da perscrutaziun turissem e svilup persistent en il Center da Capricorns a Vargistagn).»
Stefan Forster, Scola auta Turitgaisa per Scienzas Applitgadas
Flurina Graf.
En il Grischun sa zuppa anc bler ch'i vala la paina da scuvrir
«La multifariadad e la ritgezza culturala dal Grischun fascineschan mai. Tuttina sche quai èn edifizis, l'artisanadi, cuntradas culturalas, tradiziuns che sa midan u l'art figurativ, la culinarica, la musica, la litteratura u las linguas. E mai sco etnologa interesseschan natiralmain ils umans. Quels han numnadamain stgaffì questa cultura, renoveschan cuntinuadamain ella, vivan e revivan ella cun lur vegnir, ir e star.
Ensemen cun la ZHAW Vargistagn avain nus da l'Institut grischun per la perscrutaziun da la cultura illustrà en ils profils da las regiuns Viamala ed Arosa/Scanvetg questa multifariadad culturala en il rom dal project «Innovaziun tras cultura», nus avain examinà sia attractivitad turistica tenor criteris dal turissem cultural e stgaffì uschia ina basa per sviluppar la purschida. Cun stgaffir forums culturals e posts da cultura regiunals avain nus pudì intensivar il barat tranter acturas ed acturs da la cultura e turisticras e turistichers ed avain creà a medem temp la basa per novas purschidas dal turissem cultural e cooperaziuns.
En il Grischun sa zuppa anc bler ch'i vala la paina da scuvrir: per osps e per nus tuttas e tuts che vivan qua. Cun graubünden Cultura pudain nus far visibla e palpabla questa ritgezza ensemen cun ils umans en las regiuns.»
Flurina Graf, Institut Grischun per la Perscrutaziun da la Cultura grischuna
Gieri Spescha.
Marcas creeschan orientaziun, dattan identitad ed èn acturas da la transfurmaziun
«Marcas creeschan orientaziun, dattan identitad ed èn acturas da la transfurmaziun. Jau sun adina fieu e flomma, cura ch'i va per scuvrir terren nov, da gughegiar da lantschar projects da pionier u per crear marcas ensemen cun partenaris e per dar in exempel co viver la transfurmaziun. graubünden Cultura è in tal project da pionier.
Dapi l'onn 2000 hai jau pudì participar al svilup da la Marca graubünden e sun dapi il 2017 il mainafatschenta. Mias ragischs schurnalisticas hai jau gì tar il radio: sco in dals emprims sun jau stà da la partida dal 1988 fin il 1995 tar l'emprim radio privat grischun «Grischa», l'ultim sco manader dal program. Sco schurnalist hai jau lura absolvì il 2000/2001 il master en management da communicaziun a l'Università della Svizzera Italiana a Lugano. Il turissem enconusch jau fitg bain pervia da mia lunga activitad sco schef da communicaziun tar Grischun Vacanzas. La campagna da reclama cun ils dus capricorns Gian e Giachen che discurran hai jau cuninizià e furmà a moda decisiva. En mes temp liber sun jau da chattar u sin il mountainbike u sin ils skis da passlung – sports che jau fatsch cun gronda passiun.»
Gieri Spescha, Marca graubünden
Martin Vincenz.
Cultura e turissem dattan impuls in a l'auter
«Sco organisaziun turistica dal chantun ha Grischun Vacanzas l'incumbensa da gudagnar dapli giasts per in creschament qualitativ en il Grischun. Sco CEO da Grischun Vacanzas dastg jau adressar dapi il 2016 ils osps ensemen cun ina rotscha capricorns cun experientscha. Jau ma legrel che nus sco part da graubünden Cultura pudain sustegnair la nova iniziativa per rinforzar il turissem cultural. Cun Grischun Vacanzas hai jau gia avant onns tutgà tar ils iniziants dal project.
Sco anteriur directur dal turissem dad Arosa e manader da blers onns dal Festival d'umor Arosa hai jau vis mez co cultura e turissem pon dar impuls in a l'auter. La communicaziun è mes mund. Uschia sun jau stà dal 2000 fin il 2007 cumproprietari e mainafatschenta da dettofatto media PR & Events e suenter manader da la communicaziun da manaschi a l'Ospital chantunal dal Grischun.»
Martin Vincenz, CEO Graubünden Ferien
