Novitads 16.06.2025
La colliaziun da cultura e turissem
En vista a la midada dal clima ed a la garanzia da naiv sbassanta dovria il turissem alpin novas perspectivas. La cultura possia dentant esser bler dapli ch'ina cumplettaziun. Ella possia daventar ina pitga solida che promova l'identitad ed il potenzial economic.
Howald avertescha dentant da furmlas curtas sco «La cultura è la nova naiv». La cultura na dastgia betg vegnir considerada sco remplazzament per il sport d'enviern. Howald propona anzi da reponderar fundamentalmain la muntada da la cultura. El discurra d'ina furma da turissem autonoma cun atgnas valurs ed agens impuls che duai esser creativa, promover l'identitad e sa referir al lieu.
Il Grischun porscha las premissas idealas: Cun 150 valladas, trais linguas naziunalas ed in grond dumber da projects da cultura istorics sco er innovativs – per exempel «Il Bügl Public» a Tschlin u la tur alva spectaculara a Mulegns – saja il potenzial cultural enorm e vegnia savens sutstimà.
graubünden Cultura vesa sasezza sco plattafurma ed intermediatura tranter las creaturas ed ils creaturs da cultura e las persunas che lavuran en il sectur da turissem. La finamira è d'entretschar questa savida, da realisar formats sco «Spazi avert & Ufficinas», profils da cultura regiunals ed ina plattafurma digitala che gidan a render pli vesaivla e pli perceptibla la cultura.
Qua sa mussa ch'i manca savens la chapientscha vicendaivla. Las turisticras ed ils turistichers han pauca savida culturala, entant che las producentas ed ils producents da cultura teman la commerzialisaziun. Exempels da success sco Segl cumprovan però ch'il turissem cultural po er esser solid er ord vista economica.
Il facit intermediar da graubünden Cultura suenter dus onns: Il potenzial è avant maun, ma l'integraziun strategica sto vegnir optimada. Per Howald èsi cler che l'avegnir dal turissem nescha or da sia varietad – e che la cultura è ina part centrala.
Cun projects, occurrenzas ed ina buna rait da contacts vegn graubünden Cultura a s'engaschar fin almain l'onn 2027 per colliar a moda durabla la cultura ed il turissem – betg sco soluziun provisorica, mabain sco strategia intenziunada e persistenta.
Contribuziun en il Rondo Magazin
Guardai qua l'entira contribuziun dal Rondo Magazin da la Südostschweiz.