Novitads 30.01.2025
Nizzegiar la cultura per carmalar giasts en il Grischun
Howald è in expert ch'è gia viagià lunsch, cun staziuns professiunalas a Roma, Kairo ed Alexandria. Gia en la Val Puschlav, nua ch'el è stà directur da turissem dal 2014 fin il 2023, ha el utilisà cun success la cultura sco factur per l'attractivitad dal lieu e posiziunà la regiun sco lieu da quietezza e culinarica.
Il project graubünden Cultura vegn purtà da l'uniun cun il medem num che sa constituescha da l'Institut per la perscrutaziun da la cultura grischuna, Grischun Vacanzas, la Marca Graubünden e la Scola auta turitgaisa per scienzas applitgadas (il post da perscrutaziun per turissem e svilup persistent a Vargistagn). Per ils emprims quatter onns ha l'uniun a disposiziun in budget da 3,2 milliuns francs. La mesadad deriva dal Chantun e da la Confederaziun, il rest sto l'uniun purtar sezza. Il project sa concentrescha sin quatter puncts centrals: installar in'organisaziun persistenta, promover il dialog tranter cultura e turissem, colliar acturs locals e sviluppar ina plattafurma digitala per purschidas culturalas grischunas.
Howald vesa in grond potenzial en il turissem cultural, in martgà cun potenzial da svilup ed ina structura da giasts interessants. Cun experientschas culturalas unicas pudess il Grischun sa differenziar dad autras destinaziun. Empè d'inventar novas occurrenzas vul el far pli visibel purschidas culturalas existentas e colliar meglier in cun l'auter ils acturs en il turissem e la cultura.
I dat dentant era sfidas: La scena culturala è fragmentada fermamain, cooperaziuns èn savens difficilas e la concurrenza per ils daners da promoziun è gronda. Tuttina datti svilups positivs, per exempel grazia a l'augment da la promoziun da la cultura chantunala u grazia a models da success sco Arosa, nua che organisaziuns culturalas e turisticas collavuran stretgamain. Il post spezialisà per la cultura e quel da l'organisaziun turistica partan là ina plazza da 100 pertschient. Per omadus posts è la medema persuna responsabla.
graubünden Cultura investescha actualmain blera energia en il svilup d'ina rait turistic culturala e l'analisa dal potenzial turistic cultural da las singulas destinaziuns.
La contribuziun en la Südostschweiz
Essas Vus abunnent:a da la Südostschweiz online? Lura pudais telechargiar qua l'entir artitgel dad Olivier Berger.